广州人越来越高
发布时间：2015/7/5 9:01:25   作者：佚名   点击：

　　◎梁倩薇 编辑

　　最近，国家卫计委一份报告引起大家讨论，里面提到：2012年，我国成年男性平均身高为167.1厘米，女性平均身高为155.8厘米。

　　呢个高度，好多网友比较过之后都报数话：“我冇拉低平均线，仲拉高咗唔少添！”就连平均身高一向喺全国排名唔高嘅广州网友都一于系咁话。

　　呢个结果，其实都唔出奇，因为身高统计包括咗老中青三代人。而上网“晒高度”嘅多数系新一代。佢哋童年营养充足，自然生得牛高马大啦——相比之下，上一代人发育关键期多数遭遇过经济困难，食唔饱营养唔够，有病有痛往往缺乏完善医疗，所以就冇儿孙辈咁高了。

　　不过，就算新一代身高增加，但广州人普遍冇北方人咁高，呢个始终系事实。事关广州地处亚热带，气候炎热，人体身陈代谢快，发育得比较早，所以就生得唔高啦。

　　但咁样嘅身高，恰好系物种适应性嘅体现——就讲呢几日，天气热到头崩额裂。如果身材高大，散热就冇咁易；如果身材矮小，散热就相对容易。所以，好多北方朋友来到广州，初时都觉得唔适应，觉得热到抖唔到气，就系呢个道理。

　　呢啲南北身高差异，都系过去几千年发展起身嘅。但而家，南北通婚越来越多，空调之类嘅人工气候环境又越来越普及，所以，南北身高差亦会慢慢缩小啦。